Last Modified: February 29 2012 14:46:57.
 പറയൂ നീ ഹൃദയമേ പ്രണയാർദ്രമായിടും
ഒരു പാട്ടിൻ മധുരമാം ഈരടിയിൽ
ഒരു പദമാകാൻ കൊതിച്ചുവോ നീ
അതിൻ പൊരുളിലെ സുരഭിലസ്വപ്നമാകാൻ (പറയൂ...)


പറയൂ നിഗൂഡമാം സ്നേഹബന്ധങ്ങൾ തൻ
ചിറകൊച്ച എൻ പാട്ടിൽ കേട്ടുവേന്നോ
പറയൂ നിൻ ഏകാന്ത സന്ധ്യകൾ തന്നതും
പ്രണയപ്രസാദമാം കുങ്കുമമോ
അറിയില്ലെനിക്കൊന്നും വെറുതേ ഞാൻ പാടുന്നൂ
മുറിവോലും പാഴ്‌മുള കേഴുമ്പോലെ (പറയൂ...)

പറയൂ പുരാതന പ്രേമഗീതങ്ങൾ തൻ
പരിമളം പാട്ടിൽ പടർന്നുവെന്നോ
വെറുമൊറ്റ വള മാത്രമണിയുന്നൊരീ കൈയ്യിൽ
ഒരു കാറ്റു ശ്രുതി മീട്ടാൻ വന്നുവേന്നോ
അറിയില്ലെനിക്കൊന്നും വെറുതേ ഞാൻ പാടുന്നു
കാടു കരിയുമ്പോളൊരു പക്ഷി കേഴുമ്പോലെ (പറയൂ...)