Last Modified: February 29 2012 14:30:36.
 
രക്തനക്ഷത്രമേ കാലം കൊളുത്തിയ
കസ്തൂരി മാംഗല്യമേ
വെട്ടം വിതയ്ക്കുക ചക്രവാളത്തിന്റെ
ഉത്തുംഗമംഗല്യ ദീപമേ

ഞങ്ങൾ വിലങ്ങുകൾ പൊട്ടിച്ചെറിയുമീ
സംഗരത്തിന്നിതിഹാസം
താരാപഥങ്ങളറിയട്ടെ ഞങ്ങൾ തൻ
ചോരയിൽ മുക്കിപ്പകർത്തൂ
(രക്തനക്ഷത്രമേ...)

നാളത്തെയോമൽ പ്രഭാതത്തിനായ്
ജീവനാളവും കാണിക്കയേകാൻ
മുന്നോട്ടു മുന്നോട്ടണഞ്ഞവർ തൻ
മനഃസ്പന്ദനം നിന്നിൽ ലയിപ്പൂ
(രക്തനക്ഷത്രമേ...)

മണ്ണിന്റെ മാനസനന്ദിനി വാടാത്ത
സിന്ദൂരപുഷ്പവും ചൂടി
മുന്നിലുദിക്കുന്ന നീയിന്നലെയെന്റെ
കണ്ണിലുദിച്ച കിനാവോ
(രക്തനക്ഷത്രമേ...)