Last Modified: August 12 2020 06:42:04.
കണ്ണൻ പോവുകയായി തോഴൻ
കണ്ണീർ തൂവുകയായി
കണ്മണി പോകരുതേ എന്നവർ ചുടു
കണ്ണീർ തൂകിയിരന്നു
കാൽക്കൽ വീണു കരഞ്ഞിതൊരാൾ
കൈക്കുമ്പിൾ നീട്ടിയിരന്നിതൊരാൾ
ലൈയ്യും മെയ്യും മറന്നു തേരിൻ
ഉരുളിൽ വീണു കരഞ്ഞിതൊരാൾ
ഗോപീഹൃദയം കേഴുകയായ്
ഗോകുലമാകെ കേഴുകയായ്
ഒന്നിച്ചാടിപ്പാടി നടന്നവർ
വെണ്ണ കവർന്നവർ കേഴുകയായ്
ഉയിരുവെടിഞ്ഞോരുടൽ പോലെ
ഉദയം കാണാത്തിരുൾ പോലെ
ഉടൽ പലതാകിലുമുയിരൊന്നായോ
രിടയർ നിരാശ്രയരായല്ലോ
മുരളി മോഹനനൊന്നു ചിരിച്ചൂ
ഒരു കതിർ കണ്ണിലുദിച്ചൂ
ഇരുനിമിഷത്തിൽ വിഷാദമകന്നു
ഒരു നവബോധമുദിച്ചൂ
യോഗവിയോഗനദീസംഗമമിതു
മഹാ കൃഷ്ണലീലാ മനോഹര
മധുരകൃഷ്ണലീലാ- ജയജയ
ശ്രീകൃഷ്ണലീലാ