Last Modified: March 18 2012 04:06:10.

മലയാളമഭിമാന പുളകിതയാവും
അമൃതസ്വരരാഗ ലാവണ്യം.
മനസുകളിൽ ഭാവലയവീണമീട്ടും
അനുപമ സംഗീത സൗഭാഗ്യം.
നിൻസ്വരം ഞങ്ങൾക്ക് സ്വന്തം - ഈ
നാദവിശുദ്ധിയും പുണ്യം.
ഉണരാൻ വെമ്പും കിനാവുകൾക്കെല്ലാം
നിൻ ഗാനമാധുരി ചിറകു നൽകി.
ആലാപനത്തിന്റെ അവികല വിസ്മയം
ജീവിതദാഹങ്ങൾക്കഴകു പൂശി.
നിൻസ്വരം ഞങ്ങൾക്ക് സ്വന്തം - ഈ
നാദവിശുദ്ധിയും പുണ്യം.
നീ പാടുമ്പോൾ ആരണ്യഹൃദയ--
സ്പന്ദനം ഞങ്ങൾ കേൾക്കുന്നു.
ജീവിതനദിയുടെ കല്ലോല ചൈതന്യം
ആത്മാവിൽ എന്നും പടരുന്നു.
നിൻസ്വരം ഞങ്ങൾക്ക് സ്വന്തം - ഈ
നാദവിശുദ്ധിയും പുണ്യം.
തലമുറകൾക്കുമേൽ കാലം വിരിയിച്ച
മായാത്ത മാരിവിൽക്കൊടിയല്ലേ?
സ്നേഹത്തിലാദരം ചാലിച്ചുനെറ്റിയിൽ
ഭാവുകത്തൊടുകുറി ചാർത്തട്ടെ?
നിൻസ്വരം ഞങ്ങൾക്ക് സ്വന്തം - ഈ
നാദവിശുദ്ധിയും പുണ്യം.